დღეს ფინანსთა მინისტრი, ივანე მაჭავარიანი ამერიკის შეერთებული შტატების საერთაშორისო განვითარების სააგენტოს (USAID) მისიის ხელმძღვანელს საქართველოში პიტერ ვიბლერს შეხვდა.

შეხვედრაზე მხარეებმა განიხილეს აშშ-ის საერთაშორისო განვითარების სააგენტოსა და საქართველოს შორის არსებული პარტნიორობის მთავარი ასპექტები, ასევე, მნიშვნელოვანი ყურადღება დაუთმეს სამომავლო თანამშრომლობის საკითხებს, მათ შორის, განათლების რეფორმის პროცესში USAID-ს მხარდაჭერის გაძლიერების შესაძლებლობებს. 

აშშ-ის საერთაშორისო განვითარების სააგენტოს ხელმძღვანელმა გამოთქვა მზადყოფნა, ამერიკის შეერთებული შტატების მთავრობის მიერ გამოყოფილი რესურსი კვლავ მიმართოს საქართველოში მიმდინარე და ასევე, ახალი პროგრამების დასაფინანსებლად, რომლის მთავარ მიზანს წარმოადგენს საქართველოს დემოკრატიული ღირებულებების, სამოქალაქო საზოგადოების, ინკლუზიური ზრდის, თავისუფალი ბაზრის და დასავლური ორიენტაციის მხარდაჭერა და გაძლიერება.