სადაზღვევო ასოციაციის ხელმძღვანელის დევი ხეჩინაშვილის ინფორმაციით, წელს სადაზღვევო ინდუსტრიის მოგება გაიზრდება და 40-50 მილიონი ლარის ფარგლებში იქნება. 

ხეჩინაშვილი ამბობს, რომ იდუსტრიის ზრდა ძირითადად გასული წლის 1 მარტიდან უცხო ქვეყნის ავტოსატრანსპორტო საშუალებების სავალდებულო დაზღვევამ განაპირობა.

დაზღვევის ზედამხედველობის სამსახურის მონაცემებით, სადაზღვევო სექტორის მთლიანი მოგების ნახევარზე მეტი 4 კომპანიაზე მოდის. 2018 წლის 9 თვეში, ყველაზე მეტი მოგება - 11,5 მილიონი ლარი "ალდაგმა" მიიღო, "თიბისი დაზღვევა“ მომგებიანობის მიხედვით მეორე პოზიციაზეა - 9 თვეში ამ კომპანიამ 6,9 მილიონი ლარის მოგება მიიღო. 

გასული წლის ანალოგიურ პერიოდთან შედარებით, "თიბისი დაზღვევის“ მოგება თითქმის 6-ჯერაა გაზრდილი. მესამე პოზიციაზე მომგებიანობის მიხედვით, "ჯიპიაი ჰოლდინგია" - 3,2 მილიონი ლარით, 2,3 მილინი ლარით კი მეოთხე პოზიციას "იმედი L" იკავებს. 

ჯამში 4-ვე კომპანიას, მოგების სახით 24 მილიონი ლარი აქვთ მიღებული, მაშინ როცა 17 სადაზღვევო კომპანიის ჯამური მოგების მაჩვენებელმა 9 თვის მონაცემებით 34,6 მილიონი შეადგინა. 

მეხუთე პოზიციაზეა "ტაო", რომელმაც 9 თვეში 1,5 მილიონი ლარის მოგება მიიღო, მეხუთეზე კი - "ირაო“ 1,2 მილიონის მოგებით. 

ფინანსური მონაცემების მიხედვით, რეგისტრირებული 17 სადაზღვევო კომპანიიდან, ერთის - "ევროინსის“ გარდა, 3 კვარტალი ყველამ მოგებით დაასრულა.